Iniciativa pol Asturianu collabora na organización d’un campamentu col asturianu como protagonista

Iniciativa pol Asturianu collabora na organización d’un campamentu col asturianu como protagonista

Publicada por Redacción Búscolu el 14/06/2019 20:54:53

El campamentu va celebrase del 7 al 14 de xunetu nel Albergue La Casona Amarilla, en Villamanín, Llión

La ONG Iniciativa pol Asturianu ta acabante anunciar la puesta en marcha d’un campamentu de branu pa rapazos y rapaces de 6 a 16 años. El campamentu va celebrase del 7 al 14 de xunetu nel Albergue La Casona Amarilla, l’antigua residencia d’Hunosa en Villamanín, Llión.

El campamentu organízase embaxo la xestión d’Abruja Ocio, con gran esperiencia na realización de
campamentos dende va años y va cuntar con un equipu de monitores de calidá, falantes d’asturianu
que van facer que toles actividaes d’ociu que van facese a lo llargo de los ocho díes d’esti únicu
campamentu n’asturianu, tengan por llingua vehicular l’asturianu.

Dende Iniciativa valórase como una actividá de gran importancia pa collaborar na tresmisión xeneracional del idioma y pueden afirmar que son munches les persones que tán matriculando a los
sos fíos nesta actividá, que como toles organizaes dende Iniciativa pol Asturianu sostiense ensin
ayudes públiques.

El campamentu va cuntar coles actividaes tradicionales de los campamentos pensaos pa la mocedá,
como gymkhanes, xuegos na piscina, miniquads, talleres… Pero amás, esti campamentu va tener
delles actividaes especiales venceyaes a la llingua y cultura asturianes, tales como talleres de xuegos
y deportes tradicionales, talleres sobre la hestoria d’Asturies.

Otru de los puntos fuertes d’esti campamentu n’asturianu ye la realización d’audiovisuales. Los neños van deprender los fundamentos básicos del trabayu audiovisual y van trabayar mano a mano con profesionales d’esti sector pa realizar proyectos de curtiumetraxes, videoclips y otres pieces d’esti tipu. Pa ello, van colaborar dende Cuatro Gotes Producciones, la plataforma de youtubers n’asturianu PlayPresta y la canal Alderiques d’Asturies.

El preciu del campamentu ye de 260,00 € con too incluyío, con descuentu a 230 pal segundu
hermanu o segundu campamentu del branu con Abruja Ocio.

Pa más información ya inscripciones tán a disposición los teléfonos 647 583 859 y 622 044 703, amás del corréu abruja@abrujaocio.com La páxina web www.abrujaocio.com tamién cunta cola información del campamentu.


Comentarios

No hay comentarios a esta noticia

Deja tu comentario